ប្រតិភូក្រុមសមាជិកព្រឹទ្ធសភាប្រចាំភូមិភាគទី១ (រាជធានីភ្នំពេញ) ដឹកនាំដោយឯកឧត្តម បណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងជាប្រធានក្រុមភូមិភាគទី១ បានអញ្ជើញគោរពវិញ្ញាណក្ខន្ធសពលោក ថេង រាមវិច្ឆធិរាជ ត្រូវជាកូនប្រុសបង្កើតរបស់ លោក ថេង សុថុល អភិបាលនៃគណៈអភិបាលខណ្ឌ៧មករា បានទទួលមរណភាព កាលពីថ្ងៃទី២៦ ខែកុម្ភៈ ឆ្នាំ២០២៥ វេលាម៉ោង២:៣០នាទីទៀបភ្លឺ ក្នុងជន្មាយុ២៥ឆ្នាំ ដោយរោគាពាធ។
មរណភាពលោក ថេង រាមវិច្ឆធិរាជ គឺជាការបាត់បង់ដ៏ធំធេងនូវកូនបង្កើត សមាជិកគ្រួសារដ៏ឧត្តមមួយរូប និងសាច់ញាតិ ប្រកបដោយគន្លងធម៌ជាទីស្រឡាញ់រាប់អានដ៏ជ្រាលជ្រៅរបស់ក្រុមគ្រួសារ និងជាការបាត់បង់នូវមន្រ្តីនគរបាលបន្តវេនមួយរូប ដែលបានខិតខំប្រឹងប្រែងបំពេញការងារជូនអង្គភាព និងបម្រើប្រជាពលរដ្ឋយ៉ាងសកម្ម នាពេលកន្លងមក។
ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងជាប្រធានក្រុមសមាជិកភូមិភាគទី១ បានរំលែកទុក្ខដ៏សែនក្រៀមក្រំ ជាមួយលោកអភិបាលខណ្ឌ ៧មករា និងសូមឧទ្ទិស ឱ្យដួងវិញ្ញាណក្ខន្ធ លោក ថេង រាមវិច្ឆធិរាជ បានទៅដល់សុគតិភព កុំបីឃ្លៀងឃ្លាតឡើយ។
ពិធីបុណ្យសពលោក ថេង រាមវិច្ឆធិរាជ ប្រារព្ធនៅ ផ្ទះលេខ៥៧០ ផ្លូវ១៩៨២ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
ប្រភព៖ នាយកដ្ឋានព័ត៌មាន
